Elevrådet - din organisasjon

Gjennom elevane sin eigen organisasjon, elevrådet, kan du formidle ditt syn på aktuelle saker.

Elevrådet vil legge tilhøva best mogeleg til rette for elevane. Dersom du synest dette er eit godt føremål, kan du la deg velje til tillitselev i klassa di og på den måten kome inn i elevrådet. Viktigaste eigenskap i dette vervet er engasjement.

Tillitselevane representerer si klasse i elevrådet og har plikt til å møte på elevrådsmøta. Han/ho avtalar med sin kontaktlærar når og korleis informasjon og diskusjonar i klassa skal skje. Klassa sin time er viktig for å skape eit godt læringsmiljø og gode relasjonar mellom elevar og lærarar. Når året er omme får du attest for arbeidet du har gjort, og denne kan du bruke i framtidige jobbsøknader.

Som namnet seier, er elevrådet elevane sitt eige råd, eit viktig bindeledd mellom elevane og leiinga. Det skal vere elevane sitt «talerør», og skal ta opp saker frå klassene og også informere elevane om aktuelle saker. Elevrådet skal arbeide med læringstilhøve, trivsel og velferdstiltak blant elevane. Dei skal legge til rette for sosiale arrangement for elevane, engasjere seg i temadagar, innsamlingsaksjon og panting av flasker til inntekt for Kenya-prosjektet på skulen. Elevrådet er rådgjevande organ for skuleutval og rektor, og det kan drøfte saker frå andre organ ved skulen eller ta opp saker på eige initiativ. Viktige saker kan leggjast fram for elevane i allmøte eller til uravrøysting.

Opplæring i elevdemokrati er del av skulen sine planar.
I starten på skuleåret vert leiar og nestleiar invitert til eiga samling i fylket, og i starten av skuleåret får elevrådet informasjon frå både Elev- og lærlingombodet og Elevorganisasjonen.

Styret

Elevrådet er samansett av alle klassene sine tillitselevar. 5 av desse utgjer elevrådstyret. 
Etter at klassene har valt tillitselev i starten av skuleåret, kallar leiinga så snart som mogleg inn til konstituerande møte i elevrådet. Her set ein saman årets elevrådstyre via eit internt val i elevrådet.

Elevrådstyret vil ha denne samansettinga:
- Leiar
- Nestleiar
- Sekretær
- Medlem 1
- Medlem 2

Når styret med leiar er velt, er det opp til styret å organisere det vidare arbeidet i elevrådet. Ei oversikt over medlemmane i årets elevrådstyre vil bli offentleggjort her og i Teams-kanalen til klassanae, så fort valet er gjennomført (ca oppstart september kvart år).

Styret har sitt eige kontor i bibliotekområdet, og eige Teams-rom som informasjonskanal ut til elevrådet. Her finn du referat, vedtekter og årshjul for elevrådet. Styret har avtalte møte med rektor/leiinga ved skulen i løpet av året.

Elevrådet vel og representantar til Elevtinget og Elevorganisasjonen sine møte i fylket.

Elevombod

I starten på skuleåret vel elevrådet eit elevombod, som skal ivareta elevane sine rettar.

Skule- og skulemiljøutvalet

Elevrådet vel 6 representantar til skule-/skulemiljøutvalet. Ansvarsområda for utvalet er oppfølging av kvalitetsarbeidet ved skulen, mål- og tiltaksplan, utviklingsarbeid, investeringar og budsjett og andre saker som gjeld skulemiljøet.

Under Snarvegar finn du linkar til nettstader med nyttige tips og informasjon knytt til elevrådsarbeid.